360 டிகிரி ப்ளேயர் என்று அழைக்கப்படும் தென் ஆப்பிரிக்க லெஜண்ட் ஏ.பி.டிவிலியர்ஸ் ஓய்வை முடித்துக் கொள்ள விருப்பம் இல்லை என்றும் ஓய்வு முடிவு எடுத்தது எடுத்ததுதான் திரும்பி வரும் எண்ணமில்லை என்று திட்டவட்டமாகக் கூறியுள்ளதாக தென் ஆப்பிரிக்க கிரிக்கெட் வாரியம் அறிவித்துள்ளது.

இது தொடர்பாக கிரிக்கெட் தென் ஆப்பிரிக்கா வெளியிட்டுள்ள அறிவிப்பில், “ஏ.பி.டிவிலியர்சுடன் ஆலோசனை நிறைவடைந்தது. அவர் ஓய்வை முடித்துக் கொள்ள விரும்பவில்லை, ஒருமுறை ஓய்வு அறிவித்து விட்டால் அவ்வளவுதான் அந்த முடிவை மாற்றிக் கொள்ளும் எண்ணமில்லை என்று திட்டவட்டமாகத் தெரிவித்துள்ளார்” என்று கூறியுள்ளது.

2015 உலகக்கோப்பை ஆஸ்திரேலியாவில் நடந்த போது நியூஸிலாந்துக்கு எதிரான அரையிறுதியில் டேல்ஸ்டெய்ன் சொதப்பலால் இறுதி வாய்ப்பை இழந்த தென் ஆப்பிரிக்க அணியின் கேப்டன் ஏ.பி.டிவில்லியர்ஸ். அப்போதிலிருந்தே மனமுடைந்த டிவில்லியர்ஸ் 2018-ல் டெஸ்ட் மற்றும் ஒருநாள் போட்டிகளிலிருந்து ஓய்வு பெற்றார். 2019 உலகக்கோப்பைக்கு முன்னதாகவே ஓய்வு அறிவித்தது பலருக்கும் ஆச்சரியத்தையும் அதிர்ச்சியையும் ரசிகர்களுக்கு சோகத்தையும் ஏற்படுத்தியது.

இதனையடுத்து மே.இ.தீவுகள் பயணத்துக்கு தென் ஆப்பிரிக்கா இன்று அணியை அறிவிக்கையில் டெஸ்ட் அணிக்கு இடது கை தொடக்க வீரர் டீன் எல்கரை கேப்டனாக்கியுள்ளது, இவர் முதன்முதலாக தென் ஆப்பிரிக்கா கேப்டனாக்கப்பட்டுள்ளார்.

அயர்லாந்து மற்றும் மே.இ.தீவுகள் அணிகளுக்கு எதிரான தென் ஆப்பிரிக்க டி20 அணிக்கு தெம்பா பவுமா கேப்டனாக நியமிக்கப்பட்டுள்ளார்.

ஆப் ஸ்பின்னர் பிரணலன் சுப்ராயன் மே.இ.தீவுகளுக்கு எதிரான டெஸ்ட் அணியில் இடம்பெற்றுள்ளார். அதே போல் லிசாத் வில்லியம்ஸ் என்ற வீரரும் முதல் முறையாக தென் ஆப்பிரிக்க அணியில் சேர்க்கப்பட்டுள்ளார்.

சுப்ராயன், ஷம்சி, கேஷவ் மகராஜ், ஜார்ஜ் லிண்டே ஆகிய ஸ்பின் பவுலர்கள் அணியில் உள்ளனர். 11 ஆண்டுகளுக்குப் பிறகு மே.இ.தீவுகளுக்குச் செல்கிறது தென் ஆப்பிரிக்க அணி.

இதோடு புதுமுகங்களான கைல் வெரினி, கீகன் பீட்டர்சன், சாரெல் எர்வீ, மார்கோ ஜேன்சன் ஆகியோரும் தேர்வு செய்யப்பட்டுள்ளனர். ஜூன் 1ம் தேதி செயிண்ட் லூசியாவுக்கு வருகிறது தென் ஆப்பிரிக்க அணி.

மே.இ.தீவுகளுக்கெதிரான டெஸ்ட் தொடருக்கான தென் ஆப்பிரிக்க அணி வருமாறு:

டீன் எல்கர் (கேப்டன்), தெம்பா பவுமா ( துணைக் கேப்டன்), டீ காக், சாரெல் எர்வீ, பியூரன் ஹென்றிக்ஸ், ஜார்ஜ் லிண்டே, கேஷவ் மகராஜ், லுங்கி இங்கிடி, அய்டன் மார்க்ரம், வான் டெர் ட்யூசன், வியான் முல்டர், ஆன்ரிச் நார்ட்டியே, கீகன் பீட்டர்சன், கேகிசோ ரபாடா, கைல் வெரினீ, ஷம்சி, லிசாட் வில்லியம்ஸ், பிரணலன் சுப்ராயன், மார்கோ ஜேன்சன்.


மேலும் இதுபோன்ற செய்திகளை உடனுக்குடன் தெரிந்துகொள்ள
E7 Tamil Whatsapp Channel-ஐ Follow பண்ணுங்க
Whatsapp Channel Link:- https://whatsapp.com/channel/0029Va9LGy4FXUuiUvhKXV1S